Wadooyinka Muqdisho oo maanta dib loo furay kadib xayiraadii saarneed maalmihii ugu dambeysay

Waxaa maanta dib loo furay dhamaan wadooyinka magaalada Muqdisho oo maalmihii ugu dambeeysay u xirnaa shir madaxeedka urur goboleedka IGAD oo maalintii shalay lagu soo gaba-gabeeyay magaalada Muqdisho.

Ciidamada nabad-sugidda qaranka iyo kuwa militeriga Soomaaliya ayaa maanta dhamaan wadooyinkaasi furay, waxaana si caadi ah kusoo noqday isku socodka gaadiidka iyo dadweynaha ee ka jiray wadooyinkaas.

Wadooyinka Makka Al-mukarama, Wadnaha, Zoobe, Sodonka iyo kuwa kale oo badan oo maalmihii ugu dambeysay xirnaa ayaa maanta waxaa lagu arkayaa gaadiidka kala duwan ee kuwa BL-ka iyo kuwa gaarka loo leeyahay oo isticmaalaya wadooyinkaas.

Sidoo kale shacab badan ayaa maanta waxay si is-daba joog ah u marayaan wadooyinkaasi oo mudooyinkii dambe u xirnaa arrimo amni awgeed, waxaana sidoo kale dib usoo laabtay dhaq-dhaqaaqii ganacsi ee ka jiray wadada Makka Al-Mukarama, halkaasi oo ganacsigeeda maalmihii lasoo dhaafay xirnaa.

Ugu dambeyntii, madaxweynaha dowladda federaalka Soomaaliya Xasan Sheekh Maxamuud ayaa shacabka Muqdisho uga mahad-celiyay dulqaadka ay ka muujiyeen xirnaanshiyaha wadooyinkaasi arrimo amni awgeed, wuxuuna madaxweynaha sheegay inay ahayd mid lagu sugaayay ammaanka shirka madaxda urur goboleedka IGAD ee maalintii shalay Muqdisho ka dhacay.

error: Content is protected !!