Madaxda shirka IGAD oo maanta heshiis ku gaaray in xal loo helo qaxootiga Soomaaliyeed (SAWIRO)

Madaxweynaha Jamhuuriyadda Federaalka Soomaaliya Mudane Maxamed C/laahi Farmaajo iyo madaxda dalalka urur goboleedka IGAD ayaa isugu yimid shir gaar ah oo looga arrinsanayay sidii xal waara loogu heli lahaa qoxootiga Soomaaliyeed.

Shir-madaxeedkan gaarka ah ayaa uljeedadiisu tahay in lagu xoojiyo illaalinta xuquuqda qaxootiga, lagana wada hadlo sidii looga jawaabi lahaa abaaraha ka jira guud ahaan gobolka, isla markaasna loo mideyn lahaa dadaallada beesha caalamka ee dhaqaalaha loogu uruurinayo dadka ay abaarahu saameeyeen.

Madaxweyne Farmaajo ayaa la wadaagay madaxda dalalka ku bahoobay urur goboleedka IGAD dadaallada ay dowladda Soomaaliya ugu jirto inay ku yareeyso sababaha keenay amni darrada iyo abaaraha dalka ku soo noq-noqday.

Wuxuu madaxweyne Farmaajo ugu baaqay hay’adaha ka shaqeeya samafalka iyo horumarinta inay u guuraan gudaha Soomaaliya, si ay u daboolaan baahiyaha taagan.

“Waan dareensannahay duruufaha amni ee ka jira dalka, laakiin dalka intiisa badan waa nabad. Tijaabooyinkii hore waxaan ka barannay in marka ay hay’adaha ku shaqeeyaan gudaha dalka aad loo dareemo saameyntooda marka loo barbardhigo in ay ku shaqeeyaan meel ka baxsan dalka.” Ayuu yiri madaxweyne Farmaajo

Dhinaca kale, madaxweynaha ayaa qiray in xal waara oo loo helo qaxootiga ay u baahantahay in la dejiyo siyaasado lagu hagayo dib u dejinta, guriyeynta iyo isdhexgalka bulshada.

“Ma aha wax sahlan, laakiin waxaan aaminsanahay in aan haysanno fursad aan kaga faa’iideysan karno jawiga wanaagsan ee ay abuurtay doorashadeyda.” Sidaas waxaa yiri madaxweyne Farmaajo

Madaxda urur goboleedka IGAD ayaa isku raacay in la qaato hab bulshada oo dhan ay ka qeyb qaadanayso taasoo lagu ilaalinayo xuquuqda qaxootiga, gaar ahaan dumarka, carruurta iyo dadka nugul.

Ugu dambeyntii, madaxweyne Farmaajo ayaa uga mahad-celiyay dowladaha iyo shucuubta waddamada xubnaha ka ah urur goboleedka IGAD iyo dalka Yeman sida ay u marti-galiyeen in ka badan hal milyan oo qaxooti Soomaali ah.

error: Content is protected !!