Dowladda iyo maamulka Galmudug oo maanta seddax qodob ku heshiiyay (AKHRISO)

Dowladda federaalka Soomaaliya iyo maamulka Galmudug ayaa maanta magaalada Cadaado ku kala saxiixday heshiis ka kooban seddax qodob, kaasi oo ku aadan dib u dhigista doorashada madaxweynaha Galmudug.

Heshiiska waxaa ku xusan in 30-ka bishaan ay dhici doonto doorashada madaxweynaha Galmudug, sidoo kalena la furi doono wadahadallada Ahlu-sunna iyo Galmudug.

Waxaa heshiiskaan dhanka dowladda u saxiixay wasiirka arrimaha gudaha Cabdi Faarax Juxa, halka dhanka Galmudug u saxiixeen madaxweyne ku xigeenka, Guddoomiyaha baarlamaanka iyo guddoomiyaha guddiga doorashada ee maamulkaasi.

Qodobada heshiiska

  • In dib loo dhigo doorashada madaxweynaha Galmudug ee horey loo qorsheeyey iney dhacdo 10-April-2017, lana qabto 30-April-2017, taas oo waafaqsan codsigii Ra’iisul wasaaraha xukuumadda federaalka Soomaaliya ee ahaa in dib loo dhigo doorashada madaxweynaha Galmudug.
  • Mudada u dhaxeysa 10-ka illaa 24-ka bishan April 2017 waxaa soconaya wada hadallada dib u heshiinta Galmudug iyo Ahlu-sunna Waljameeca iyo hirgelinta qodobada heshiiskaasi kasoo baxa.
  • Mudada u dhaxeysa 25-ka illaa 30-ka bisha Afaraad ee 2017 waxaa la qaban qaabinayaa doorashada madaxweynaha dowlad goboleedka Galmudug oo dhaceysa 30-ka bishan.

Ahlu-sunna ayaa la doonayaa in qeyb weyn ay ka noqoto maamulka Galmudug, waxayna tani muujineysaa in dowladda Farmaajo ay qancineyso cid walbo oo wax tabeysa.

error: Content is protected !!