Kulanka wasiirada oo warbixin looga dhageystay qaar kamid ah wasaaradaha iyo hay’adaha amniga (SAWIRO)

Golaha wasiirada ee xukuumada federaalka Soomaaliya ayaa maanta yeeshay kulankoodii caadiga ahaa oo uu shir-guddoominayay ra’iisul wasaaraha xukuumada Mudane Xasan Cali Kheyre, waxaana kulanka warbixino looga dhageystay qaar kamid ah wasaaradaha iyo hay’adaha ammaanka.

Ugu horeyn, golaha ayaa warbixin ka dhageystay taliyaha hay’adda nabad-sugidda iyo sirdoonka Qaranka, Mudane C/laahi Sanbaloolshe oo ka hadlay howlgallo ay ciidamada amnigu ka sameeyeen caasimadda inta lagu guda jirey bishan Ramadaan, wuxuuna tilmaamay in la fashiliyey lana fuliyey qorshe-yaal badan oo cadowgu doonayeen in ay ku qal-qalgeliyaan amniga Muqdisho.

Wasiirka gargaarka iyo maareynta masiibooyinka, Marwo Maryam Qaasim ayaa ka warbixisay safaro ay ku tagtay gobollada Bay, Bakool iyo Gedo, waxaana ay sheegtay in dadka gobolladaasi dagan ay ku sugan yihiin xaalad adag, gaar ahaan degmada Waajid oo go’doon ay galiyeen kooxaha argagixisada una baahan gurmad in loo fidiyo shacabka halkaasi dagan.

Sidoo kale, wasiirka arrimaha dibedda Mudane Yuusuf Garaad ayaa laga dhageystay warbixin ku aadan qorshaha iyo qaabka wax ka badelka wasaaradda iyo safiirada dibedda u jooga Soomaaliya, wuxuuna tilmaamay wasiirku in loo baahan yahay dib u habayn in lagu sameeyo qaabka ay u shaqeeyaan safaaradaha dibedda ugu yaalla Soomaaliya, isla markaana la dhaqan geliyo sharcigii arrimaha dibedda ee horey loo ansixiyey.

Ugu danbeyntii, ra’iisul wasaaraha ayaa golaha wasiirada kula dar-daarmay in howlaha muhiimka ah ee horyaala dhaqso loo fuliyo si shacabka Soomaaliyeed ay u gaaraan adeegyada ay u baahan yihiin.

-DHAMMAAD-

Xafiiska Warbaahinta iyo Xiriirka
Muqdisho, Somalia
media@opm.gov.so
Ahmednur@opm.gov.so
Twitter: @SomaliPM

error: Content is protected !!