Qodobo xasaasi ah oo looga hadlay shirka maanta ee golaha wasiirada Soomaaliya

Golaha wasiirada ee xukuumada federaalka Soomaaliya ayaa maanta yeeshay kulankoodii caadiga ahaa oo uu shir-guddoominayey ra’iisul wasaaraha xukuumada Mudane Xasan Cali Kheyre, waxaana arrimaha diirada lagu saaray shirkaan ka mid ahaa ansixinta shuruucda isgaarsiinta iyo la-dagaalanka arga-gaxisada iyo arrimo kale.

Ra’iisul wasaare Xasan Cali Kheyre oo furay shirka ayaa sheegay in xukuumadu ay ahmiyad gaar ah siineyso sidii dalka u yeelan lahaa shuruucda muhiimka u ah dowlad wanaaga.

Golaha wasiirada ayaa ugu horeyn si kulul u cambaareeyey qaraxyadii argagaxisada ay ku bar-tilmaameysanayeen shacabka, ee kii maanta wadada Makka Al-Mukarama iyo tii xarunta degmada Wadajir.

Golaha ayaa shacabkii ku geeriyooday EEBBE uga baryey inuu Jannadii Fardowza ka waraabiyo, inta dhaawaca ahna EEBBE u sahlo dhaawacooda. Golaha ayaa dowlada Sucuudiga uga mahadceliyey dhaawacii dalka Sacuudiga loo qaaday.

Wasiirka boostada, isgaarsiinta iyo teknoloojiyada Eng. Cabdi Canshuur Xasan ayaa golaha wasiirada warbixin ka siiyey hindise sharciyeedka isgaarsiinta, doorarka uu soo maray iyo muhiimada uu dalka u leeyahay.

Wasiirka ayaa sheegay in wadatashi dheer oo lala sameeyey shirkadaha isgaarsiinta, wasiirada dowlad goboleedyada iyo qeybaha ay khuseyso in lasoo diyaariyey xeerka isgaarsiinta oo faa’iido weyn u leh shirkadaha isgaarsiinta, shacabka isticmaala adeegyada isgaarsiinta iyo shacabka guud bacdamaa dowladdu heleyso dakhli ka soo gala canshuurta isgaarsiinta.

Dood dheer ka dib ayey golaha wasiirada si wadar-oggol ah ku ansixiyeen hindise sharciyeedka isgaarsiinta oo dhawaan loo gudbin doono golaha shacabka.

Wasaarada garsoorka ayaa golaha wasiirada horkeentay hindise sharciyeedka la dagaalanka musuq-maasuqa oo muhiim u ah dowlad wanaaga, isla xisaabtanka iyo kordhinta dakhliga dowlada.

Dood dheer ka dib ayey Golaha Wasiiradu si wadar-oggol ah ku ansixiyeen Sharcigan oo dhowaan la horgeyn doono Baarlamaanka.

Ugu danbeyntii Ra’iisul Wasaaraha ayaa sheegay in maanta ay tahay maalin taariikhi ah oo sharciyo muhiim u ah dalka la ansixiyey, lana rajeynayo in shuruucda harsan dhowaan la horkeeni doono golaha wasiirada.

Ra’iisul Wasaarahaa ayaa wasiirada ku booriyey inay soo dedejiyaan Hindise Sharciyeedyada ay ku howlan yihiin si Xukuumada ay u gudato waajibaadka loo igmaday, dalkana loo gaarsiiyo doorashooyin hal cod iyo hal qof ah.

-DHAMMAAD-

Xafiiska Warbaahinta iyo Xiriirka
Muqdisho, Somalia
media@opm.gov.so
Ahmednur@opm.gov.so
Twitter: @SomaliPM

error: Content is protected !!