Cudurka Coronavirus oo si xowli ah ugu sii faafaya deegaanada Puntland

War qoraal ah oo kasoo baxay wasaaradda caafimaadka maamulka Puntland ayaa lagu sheegay in saacadihii lasoo dhaafay 24 qof laga baaray cudurka coronavirus ee COVID-19 islamarkaana laga helay 13-ruux.

Wasaaraddu waxay sheegtay 13-ka ruux ee cudurka laga halay 6 ka mid ah ay yihiin rag, halka 7-da kalena ay dumar yihiin, kuwaas oo ay da’dooda u dhaxeeyso 23-illaa 33 sano.

5 ka mid ah dadka cudurka laga helay ayaa waxay ku sugan yihiin magaalada Gaalkacyo, halka 4 ruux kale ay joogaan Boosaaso, iyadoona 4-ta ruux kalena ay joogto magaalada Garoowe.

Wadarta guud ee dadka xanuunka laga helay deegaanada Puntland ayaa gaartay 111 ruux, waxaana illaa iyo haatan la xaqiijiyay inay geeriyootay 5 qof, halka 3 kalena ay ka bogsatay.

Maalintii shalay ayay ahayd markii wasiiradda caafimaadka dowladda federaalka Soomaaliya Fowziya Abiikar Nuur ay sheegtay in dalka oo idil laga diiwaan-geliyay 1,219 xaaladood, hase ahaatee la fillayo in saacadaha soo aadan ay tirada intaasi ka badato.

Si kastaba ha ahaatee, cudurka COVID-19 ee coronavirus ayaa u muuqda mid si xowli ah ugu sii faafaya geyiga Soomaalida, xilli ay dadka Soomaaliyeed u muuqdaan kuwa weli iska dhego tiraya tallooyinka ay waaxaha caafimaadka jeedinayan.

error: Content is protected !!