Guddiga madaxa bannaan ee doorashooyinka qaranka ayaa magaalada Dhuusamareeb ka furay tababar loogu talagalay wakiillada ururrada siyaasadeed ee ka qeyb galaya doorashada Galmudug, kaas oo lagu xoojinayo fahamka hannaanka doorashooyinka iyo habraacyada lagu maamulayo geeddi-socodka.
Tababarkaan ayaa wakiillada ururrada siyaasadeed lagu barayaa xeerarka doorashada, nidaamka loo maro howlaha doorashooyinka iyo doorka ay ku leeyihiin ilaalinta hufnaanta, daahfurnaanta iyo kalsoonida hannaanka doorashooyinka.
Mas’uuliyiinta guddiga madaxa bannaan ee doorashooyinka qaranka ayaa sheegay in tababarradaan ay qeyb ka yihiin qorshayaasha lagu xoojinayo diyaar-garowga doorashooyinka Galmudug, isla markaana lagu hubinayo in dhammaan dhinacyada ku lugta leh ay helaan xog iyo aqoon ku filan oo ku saabsan waajibaadkooda iyo howlaha la xiriira doorashada.
Sidoo kale, wakiillada ururrada siyaasadeed ee ka qeyb galaya tababarka ayaa loo soo bandhigay habraacyada doorashada, mas’uuliyadaha saaran iyo muhiimadda ay leedahay in la helo wada-shaqeyn ku dhisan isfaham, ixtiraam iyo u hoggaansanaanta xeerarka.
Ugu dambeyn, guddiga madaxa bannaan ee doorashooyinka qaranka ayaa mar kale adkeeyay muhiimadda ay leedahay in doorashooyinka dalka ay ku qabsoomaan jawi nabdoon, caddaalad ah, hufan oo waafaqsan dastuurka, shuruucda dalka iyo xeerarka u yaalla doorashooyinka.
Si kastba ha ahaatee, tababarkaan ayaa qeyb ka ah dadaallada lagu diyaarinayo dhinacyada kala duwan ee ka qeyb qaadanaya doorashada Galmudug, iyadoo guddigu xoogga saarayo wacyigelinta, kor u qaadidda aqoonta iyo xaqiijinta in hannaanka doorashooyinka uu u socdo si hufan oo nidaamsan.