Madaxweyne Xasan Sheekh iyo RW Xamse oo qadka teleefanka kula xiriiray madaxweyne Deni

Waxaa habeenkii xalay xarunta madaxtooyadda Soomaaliya ee magaalada Muqdisho kullan xasaasi ah ku yeeshay madaxweynaha Soomaaliya Xasan Sheekh Maxamuud, ra’iisul Wasaaraha Xukuumadda Xamse Cabdi Barre iyo Guddoomiye ku-xigeenka koowaad ee Golaha Shacabka Sacdiya Yaasiin Samatar.

Kullankaasi ayaa sida la sheegay looga hadlay dhacdadii Isniintii lasoo dhaafay is hor-istaaga loogu sameeyay guddoomiye Sacdiya Yaasiim Xaaji, xilli ay dooneysay inay ka degto garoonka diyaaradaha magaalada Boosaaso ee xarunta gobolka Bari.

Ilo-wareedyo lagu kalsoonaan karo ayaa sheegaya in madaxweyne Xasan Sheekh iyo ra’iisul wasaare Xamse Cabdi Barre ay qadka telefoonka kula xiriireen madaxweynaha Puntland Saciid C/laahi Deni oo ay kala hadleen wixii dhacay iyo xallinta xiisada ka dhalatay iska horimaadkii sababay is hor-istaagii lagu sameeyay Sacdiya Samatar.

Dhinaca kale, madaxweynaha iyo ra’iisul wasaaraha ayaa ku guuleystay baajinta shir jaraa’id oo ay qaban laheyd guddoomiye ku-xigeenka koowaad ee golaha shacabka Sacdiya Yaasiim Samatar, ay ku dooneysay inay uga hadasho dhacdadii dhacday.

In ka badan 10 ruux ayaa ku dhimatay iska hor-imaad ka dhacay magaalada Boosaaso ee gobolka Bari, kaas oo u dhexeeyey ciidamo ka wada tirsan maamulka Puntland, kuwaasi qaarkood doonayey inay garoonka kasoo galbiyaan guddoomiye Sacdiya.

Guddoomiye ku-xigeenka koowaad ee golaha shacabka Sacdiya Yaasiin Samatar ayaa gar-gaar u waday magaalada Boosaaso, iyadoo dooneysay inay ku wareejiyo maamulka Puntland, hase yeeshee diyaaradii siday ayaa loo diiday inay ka degto garoonka.